السلام عليكم و رحمة الله و بركاتة
صباحكم ورد بريحة الفل و لون البنفسج و عطر الياسمين و ريحان علي الجنبين .
كلنا بيبات عندنا اكل و للاسف اغلب ولادنا مدلعين و مبيحبوش الاكل البايت و في الاخر نضطر اسفين نرمي الاكل البايت رغم انه سليم و دة طبعا له تثير سلبي علي ميزانية البيت , طيب يا تري في حلول للمشكلة دي؟؟ يعني ممكن نقنع ولادنا انهم ياكلوا الاكل البايت؟؟ ايوة ممكن لو قدرنا نعمل تغيير في طعم الاكل بحيث نقنعهم ان دي اكلة جديدة مختلفة عن اكلة امبارح و اختلاف الطعم حيدي عندهم احساس انهم بياكلو اكله جديدة لسة مطبوخة النهاردة.
الموضوع دة هنا عشان كل واحد يحط وصفة لتغيير طعم الاكل البايت.
و انا حبدأ معاكم بأول وصفة ..
المكرونة لما بتبيت بتبقي صعبة جدا و اغلبنا مش بيكون مقبل علي اكلها مرة تانية .. طيب نعمل ايه عشان نقدر ناكلها لما تبيت يوم او يومين كمان ..
هاتي واحدة فلفل اخضر او شطة خضرا حسب الطلب و قطعيها قطع صغيرة و دبليهم في معلقتين زيت علي النار و قطعي 2 او 3 طماطم, حسب الطلب و حسب الكمية اللي تفضليها , لقطع صغيرة و حطيها علي الفلفل بعد ميدبل و سيبها علي النار فترة بس يفضل انها متستويش اوي زي الصلصة عشان نقدر ندي للمكرونة طعم مختلف عن طعم الصلصة و بعد كدة نضيف المكرونة عليها و نقلبها و نسيبها لحد متسخن كويس.
و بكدة تكوني اديتي للمكرونة طعم مختلف عن طعمها اول يوم.
يا رب الموضوع يعجبكم و يكون مفيد و اتمني اننا كلنا نشارك بوصفات لتجديد الاكل البايت.
خالص ودي
موضوع: نعمل ايه فى الاكل البايت ؟؟؟؟؟ 
الإثنين ديسمبر 14, 2009 8:12 pm
